ብዙሓት ነፍሰ ጾር ኣብ ዘለዋሉ እዋን ዕግርግር ይብለን። ገሊኤን ድማ የምልሳ።.

ነፍሰ ጾር ኣብ ዘለኽሉ እዋን ድኻም ክስምዓኪ ንቡር እዩ።

ሓደ ሓደ ግዜ እቲ ድኻም ብሰንኪ ዋሕዲ ደም ክኸውን ይኽእል እዩ። ስለ’ዚ እያ እታ መሕረሲት ናብ ክሊኒክ ነፍሰ ጾራትን ሓራሳትን ክትበጽኺ ከለኺ ንፍቕዲ ደምኪ (blodvärde) ትምርምሮ። እቲ ፍቕዲ ደም ኣዚዩ ትሑት ምስ ዝህሉ፡ ናይ ሓጺን ከኒና ክትወስዲ ከድልየኪ ይኽእል እዩ።

ከብድኺ ብዝተፈላለየ ምኽንያታት ከቐንዝወኪ ይኽእል እዩ። ማህጸን ስለ ዝዓቢ ዘሎን እቲ ቈልዓ ስለ ዝንቀሳቐስን። ከምኡ’ውን ምጭባጥን ምዝርጋሕን ማህጸን ገይሩልኪ ክህሉ ይኽእል።

ኣብ እዋን ጥንሲ ኣብ ኣካላት ዘለዉ መላግቦታት ብዝያዳ ይልምልሙ እዮም። ቃንዛ ኣብ ከባቢ ጎሎኽን ኣብ ታሕተዋይ ክፋል ሕቖኽን ክገብረልኪ ይኽእል።

ነፍሰ ጾር ኣብ ዘለኹሉ እዋን ስርዓተ ምክልኻል ሕማም ኣካላትኪ ይዳኸም እዩ። ኣብ ከምዚ ኵነት ብቐሊሉ ጕንፋዕ ክሕዘኪ ይኽእል።

ኣብ መጀመርታ ጥንሲ ኣጥባት ይዓብዩ እዮም። ጸባ ምፍራይ ንኽኽእሉ ይዳለዉ።  

እዚ ኣብ ምሉእ እዋን ናይ ጥንሲ ኣብ ኣጥባትኪ ናይ ቃንዛን ምውጣርን ስሚዒት ክገብረልኪ ይኽእል እዩ።

ኣብ እዋን ጥንሲ  ዝያዳ ነዝዒ ክፈሰኪ ንቡር እዩ። ነዝዒ (Flytning)፡ ካብ ርሕሚ ዝወጽእ ፈሳሲ እዩ።

ኣብ እዋን ጥንሲ ድቃስ ክኣብየኪ ንቡር እዩ። እዚ ንኣብነት ክትድቅስሉ እትኽእሊ ምቹእ ኣደቓቕሳ ንኽትረኽቢ የሸግረኪ ይኸውን። ገሊኤን ነፍሰ ጾራት ብተደጋጋሚ ተንሲኤን ምሻን ከድልየን ይኽእል እዩ።

ምሽምቃቕ ጭዋዳ ኣብ ዳንጋ 

ገሊኤን ምሽምቃቕ ጭዋዳ ኣብ ዳንገኣን ገይሩለን ክበራበራ ይኽእላ። ሽዑ ንሓጺር ግዜ ብርቱዕ ቃንዛ ክገብረልኪ እዩ። ሓደገኛ ግን ኣይኮነን። 

ጠጠው እንተ ኢልኪ ክሕግዘኪ ይኽእል እዩ። ከምኡ’ውን እንተ ገደፈኪ ንዳንጋኺ ምድራዝ ክትፍትንዮ ትኽእሊ ኢኺ።

ነፍሰ ጾር ኣብ ዘለኽሉ እዋን ኣብ ኣካላትኪ ብዙሕ ፈሳሲ ኣሎ። እዚ ንልፋጫዊ መምብራና ከም ዝሓብጥ ስለ ዝገብር ብቐሊሉ ክትደምዪ ትኽእሊ።  

ንኣብነት ነስሪ ደም ክገብረሊ ይኽእል። ኣፍንጫኺ ክትዕበሲ እውን ንቡር እዩ። 

ርእስኺ ክብ ኣቢልኪ ደቅሲ 

ኣፍንጫኺ ምስ ትዕበሲ ርእስኺ ክብ ኣቢልኪ ክትድቅሲ ፈትኒ። 

ኣብ ኣፍንጫኺ ጨዋም ማይ (koksaltlösning) ምግባር እውን ክትፍትኒ ትኽእሊ ኢኺ። ካብ ቤት መድሃኒት ክትገዝእዮ ትኽእሊ ኢኺ። 

ሓኪም ዘይኣዘዞ ኣብ ኣፍንጫ ዝንፋሕ መድሃኒት (näsdroppar) ካብ ዓሰርተ መዓልቲ ንላዕሊ ምጥቃም ኣወግዲ።

ኣብ መወዳእታ እዋን ናይ ጥንሲ መብዛሕትኡ ግዜ ኣእጋርን መራግጾ እግርን ይሓብጡ እዮም። ኣብ ከምዚ ኵነት ጨቢጡ ዝሕዝ ካልሲ (stödstrumpor) ክሕግዝ ይኽእል እዩ።  

ኣእጋርኪ ኣልዕል ኣቢልኪ ምድቃስ እውን ፈትኒ።

ንገሊኤን ኣብ ቆርበተን ምልክት ምጥጠት ይገብረለን እዩ። እዚ ኣብ ቆርበት ከም ናእሽቱ መስመራት ዝመስል እዩ። እዚ ምልክት ኣይጠፍእን እዩ፡ ድሕሪ ሕርሲ ግን ክሃስስ ይኽእል እዩ።

ነፍሰ ጾር ምዃን ንኵነተ-ኣእምሮ ክጸልዎ ይኽእል እዩ። ገሊኤን ካብቲ ልሙድ ንላዕሊ ብቐሊሉ ይጉህያ ወይ ኩሉ ግዜ ጓሂ ይስምዓን።

ብዛዕባ ዝስምዓኪ ስምዒት ምስ መሕረሲት ተዛረቢ።

ኣብ መጀመርታ ናይ’ቲ ጥንሲ ጸቕጢ ደም ክትሕት ይኽእል እዩ። ሽዑ ጽርውሩው ክብለኪ ይኽእል እዩ። 

ኣብ ዳሕራይ እዋን ናይቲ ጥንሲ እቲ ጸቕጢ ደም መብዛሕትኡ ግዜ ናብ ንቡር ይምለስ እዩ። 

እታ መሕረሲት ንጸቕጢ ደምኪ ብስሩዕ ክትመዝነኪ እያ።

ኣብ እዋን ጥንሲ ድርቐት ክገብረልኪ ንቡር እዩ። Det är vanligt att få förstoppning under en graviditet. ምኽንያት ናይ’ዚ ድማ መዓናጡ ብዝያዳ ቀስ ኢሎም ስለ ዝሰርሑ እዩ። ማይ ምስታይን ምንቅስቓስን ኣይትረስዒ።

ኣብ እዋን ጥንሲ ዘጋጥሙ ልሙዳት ዝኾኑ ተወሰኽቲ ሓደ ሓደ ጸገማት ኣብዚ እነሆ፦ 

• ቃንዛ ኣብ ሕቖ 
• ሃርሃርታ ሰራውር ደም 
• ጀርባዶ (ኦሞሮዶዮ) 
• ቀሓር 
• ፈርፈርታ ልቢ 

• ሕጽረት እስትንፋስ 
• ረኽሲ ሻምብቆ ሽንቲ።

ምስ ትሻቐሊ ወይ ሕቶታት ዝህልወኪ ምስ ክሊኒክ ነፍሰ ጾራትን ሓራሳትን ክትራኸቢ ትኽእሊ ኢኺ።  

ህጹጽ ምስ ዝኸውን  

ኣብ ከብድኺ ብርቱዕ ቃንዛ ምስ ዝህልወኪ፡ ምስ ሕክምና ርክብ ግበሪ። 

ምስ ሓደ ካብዞም ዝስዕቡ ክሊኒካት ርክብ ግበሪ፦ 

• ኣብ ቀዳማይ መፋርቕ ናይ ጥንሲ፡ ምስ ክፍሊ ህጹጽ ረድኤት።   
• ኣብ ካልኣይ መፋርቕ ናይ ጥንሲ፡ ምስ ሓደ ክፍሊ መወልዳን።

ናብ ቁጽሪ ተሌፎን 1177 ብምድዋል ምኽሪ ርኸቢ 

ብዛዕባ እንታይ ክትገብሪ ከም ዘለኪ  ሓገዝ ምስ ዘድልየኪ ናብ ቍጽሪ ተሌፎን 1177 ደውሊ።  እተን ዝምልሳልኪ ኣለይቲ ሕሙማት እየን። ንሳተን ሽወደንኛን እንግሊዝኛን ይዛረባ እየን። ሓደ ሓደ ግዜ ብኻልኦት ቋንቋታት ሓገዝ ምርካብ ይከኣል እዩ።  

ብናይ ወጻኢ ሃገር ቁጽሪ ተሌፎን ምስ እትድውሊ፡ ናብ 0046 771-11 77 00 ደውሊ። 

ኣስተርጓሚ ክግበረልኪ ይኽእል እዩ   

ሽወደንኛ ዘይትዛረቢ እንተ ዄንኪ ኣስተርጓሚ ናይ ምርካብ ሓገዝ ክትረኽቢ ትኽእሊ ኢኺ። ቆጸራ ክትሕዚ እንከለኺ፡ ናይ ቋንቋ ኣስተርጓሚ ከም ዘድልየኪ ሓብሪ።